पच्छिउँसे पच्छिउँहा ब्वाल् क चिल्मोट्या ओप्फैटी
म्वार डाइक् ब्वाल् झपोट आइल
पच्छिउँहा ब्वाल् क चिल्मोट्या
ओ म्वार डाइक् ब्वाल् डब्नी भिर बेर
जाट्से म्वार डाइक् ब्वाल् क घ्याँघा
महा आँखर क डाब स्याकल् पच्छिउँहा ब्वाल्
आसकल जैबिल्ले सुन मिलठ म्वार डाइक् ब्वाल्
महा मलिन ओ भारी घोघ्र्याइल
अब्बक् यी महा बिप्टाइल् जोबाना म
आपन डाइक् ब्वाल् सब्ज
ब्वाल बिस्रा स्याकल् बाट
लिख बिस्रा स्याकल् बाट
पह्र बिस्रा स्याकल् बाट
सिखाई बिस्रा स्याकल् बाट
सिख बिस्रा स्याकल् बाट
म्वार डाइक् ब्वाल् डाईहँ डाई कहठ
बाबाहँ बाबा कहठ
मने,
पच्छिउँहा ब्वाल् क चिल्मोट्या
डाईहँ मम्मी, मोम
बाबाहँ बुवा, ड्याडी
न जाने अब्भिन का का कहक सिखाइट् का का
और यम्ह जो अब्बक जोबनक् ब्वाल्
आकुर पच्छिउँहा ब्वाल् क कुँह्रा म ओज्टि जाइटा
आपन डाइक् ब्वाल् हँ घुरौराम् फँक्टी जाइटा
अब्भिन यी पच्छिउँहा ब्वाल् ओ म्वार डाइक् ब्वाल् क डब्नी भिराहुर चल्टी बा
यिहिहँ कसिक पटक्ना हो?
सक्कु जहिन क ब्वाल् म से यिहिहँ कसिक सिरोट्ना हो?
कसिक कुचिल्ना हो?
कसिक अख्न्यैना हो?
म्वार कोल्काही बाट कह बेर
आनक् ब्वाल् फेन सिख्ना मजा बाट हो
सिखैना मजा बाट हो
टम्मान ठाउँ म काम लाग स्याकठ
आनक ब्वाल् सिख्क
आपन डाइक् ब्वाल् भर ब्वाल निछोर्ना हो
आपन डाइक् ब्वाल्
आपन लर्का पर्कन सिखैना हो
लिखैना हो
पह्रैना हो
अरे,
टुहार डाइक् ब्वाल् टुहिन चिन्हाइठ
महिन चिन्हाइठ
गाउँ घर रानपरोस चिन्हाइठ
डेस बिडेस सम टुहिन टुहार डाइक् ब्वाल्
टुहार पहिचान बटाइठ
अप्न फेन आपन डाइक् ब्वाल्
बोलक लाक,लिखक लाक,सिखक लाक करि
मै ट आपन डाइक् ब्वाल् बोल्ठु ओ जस्क टस् लिख्ठु
0 Comments