यरवा बिनै डुइ चार मौनी बिनै हजार

 दहितान खेट्वा चैनार बा। ठारु जन्निन हहरैटी बटा। सकु जन हुड हुड छलछल कर्टी डँटल बिल्गटै १०/१२ जन। उट्टर डक्खिनके खेट्वा बा। खेट्वक उट्टर पाँजर झरन। पुर्बक पाँजर भारी ह्याचरी बिल्गटा। भर्खरिक डारल मुर्गिक चिङ्ग्नी छेउ मेउ छेउ मेउ अवाज अलपट्रे सुन मिलटा। चिङ्गनिन सहेर करुइया किउ पानी डारटा ट किउ डाना। पच्छिउँ पाँजर घर। घरक छप्रम भुरे कोहँरा फरल बिल्गटा। ओम्ह कब्ली फेन लट्पटाइल पियर फुला बिल्गटा। घरक आघ चर्पी बा कलसे घरक पाछ डगर। बगर्वक डोँर्यम यक गोइँ भैँस फेन बाँढल बटै। उलार कर्क, उट्रा उप्पर बगर्वक कोरै म लर्ह्या बाँढल बा। कलसे टरे सानी खँडर्न डुग्गी और गँर्सा बा। पँञ्ज्रे यक बोझा मँरेडा घाँसक बोझा। पञ्ज्रे पुरान अभोन साइकिल खुँटा म ओँङ्ग्ठाईल बा।
मोल्हक पिठिमक झुल्वा पस्नाले भिजल बिलगटिस। ओसिक ट ढान कटुइयन भर घामे गरौर, पस्ना पसिन बटै। मोल्हक झुल्वा जहाँ जहाँ सुखल बा वहाँ भुवर न्वान उछ्रल बिल्गटिस। लाल छिट रलक प्लास्टरके काइल झुल्वा।
समय म पानी निबरस्क ढान बर्ह्या नि होके कोइ गम्ह्रा हुइल ट कोइ पाक्क चँवाइल। कोइ अभुन भर्खर फुट्क फुला लागल हुइलक कारन बाली बिग्रल रहिन। ओह साल खौही माङ्ग माङ्ग गुजारा चलैना बाढ्य हुइल रहै। म्वाल लैके खाई पर्न अवस्ठा हुइलक कारन मोल्हा जो नाउँ पर्लक हुइटिस। मोल्हा मोल्हिन्या और यक्ठो छावा मिलाक ३ पर्यार बटै। डाई बाबा मोल्हा छुनिनक रह टब्बहँ बिट सेकल रहै।

" बर्जन्न औलि आझु खवैना ट हुइ काहु"। गुर्वान छुट्की टर्नी लिल्हारिक पस्ना पोँस्टी कठिन।

"काजन कसिन कैना हो बहोर्या पैल्ह ट रान परोस गैगोट्यार सक्कु जन यक्क सङ्ग बनाई"। मोल्हा पठ्रक चक्यम हँस्या हुल्टी जवाफ लौटाइल।

"अजगराने ट घर घरहिक किल मनैल हुँ सुन टहु"? गुर्वान टर्नी पुँछल।

" आब और जन मनिल कटि घरिम हम्र फेन मनाई ट? नाही कि भलहे बाबा बाज्या हुक्रन अस नै मनाई सेक्लसे फेन मद्दत करुइया ओ डु चार घरक मनिन ट बलैही परि"।

"बेन्सेक जे जे मड्डट आइल बटो जन्निन भर बुर्ह्या कुल्वम हेल्का टापी लेल मच्छी मार जैबो, और ठारु भर मुस कोर जैही"। मोल्हा बिना किहु पाल्या डेले फेनसे कहल।
सक्कु जन हाँ म हाँ मिलैल।
गाउँ म यक घरक औलि हुइलसे ठारु मुस मारे जैना ओ जन्निन भर लग्घु रहल कुल्वा, झर्नहेम या लड्यम मच्छी जैना ओ सक्कुन निउटा डेहना चलन बरा पैल्हसे अभुन चल्टी आइल बा। यक मेरिक ट्योहार अस मना जाइठ।
  लगभग डुपहरिक २/३ बजल हुइ अन्डाजी। उट्टर डक्खिनके खेट्वक उट्रक पुर्बक पाँजर ह्याचरी हुइल पाँजर खेट्वक उँइरक कोन्वा भर ठर्ह्याइल ढान बचैल। मोल्हा घर जाक पैँरक मन्जोर्वा बनाक बाँसक कैन म २/४ ठो पट्या बचाक मखमल, गेँडक फुला घलाक आमक रुख्वम ओँङ्ग्ठाक डेउखरान घर डारु लिह गैल।

"भैनी यक बोटल दारु डेउ छाँकिक लाक"

" लेउ यिह मच्या म बैठो मामा मै सुराहँ खुड्रा डारके आउँ"
मोल्हक भैनी बगर्वमसे मच्या लान्क मोल्हाहँ बैठैली और सुराहँ खुड्रा डार गैली।

  "अरे मोल्हा डाडु अप्ने फेन यहोरे"? मोल्हा मच्यम बैठल रह कि गुर्वान छोट्का डगर म से बोल्कारल।

"आज औलि कैना कलक हो भाइ ओह मार छाँकी लिह आइल बटु, अप्न जे"? मोल्हा हाँटम रहल बोटल भुइयम ढर्टि यक सँस्सु कहल।

"मिन्झ्नी लगाइ अस आइल बटु"। गुर्वान छोट्का जवाफ लौटाइल।

ओट्रहम मोल्हक भैनी " डेउ मामा बोटल"।

गुर्वान छोट्का मिझ्नी खाइ अइल ओरसे मोल्हक भैनी हे "भैनी म्वार लाक फेन यक गिल्सा बरा आनडेहो"।

"नाही नाही भैनी डु ठो गिलासम बरिहो, बेन्सेक डु गिलासके फेन रुप्या काट लेहो"। लेउ भाइ आज मोरे टरफसे पिलेउ"। हाँ बेन्सेक सन्झ्यक औलि खाए फेन हमरे घर ओहर अइहो"।
" भैनी टुह फेन अइहो"।
"म्वार ट कनि सढ्ना अस नै हो मामा , बेन्सेक बाबाहँ लैजिहो"।

मोल्हक भैनी घरम जन्नी मनै अक्लि। कैयो ठो सुवर, छेगरी, भेँरी पल्लक कारण ढन्ढा उसर्ना कर्रा पर्ठिन ओह मार से सन्झ्यक औलि खाए जाइ निसेक्न बाट जनैलिन।

ठिक बा कटि डुन जन आपन आपन डगर लग्ल।

मोल्हा सरासर आमक रुख्वम ओँग्ठाइल मन्जोर्वा, गेँडा, मखमल फुलक माला लगाइल बाँसक कैन लेह्ल खेट्वा ओँहर लागल। टब सम्म ढान कटुइया जन्नी ठारु भिलौरिक रुख्वक छाँही टर सिट्रैटी रहै। मोल्हा औलि उटारक लाक सक्कुन गोहराइल। मन्जोर्वा टाँगल बाँसक कैन उट्रक पुर्बक कुन्वम गारल। मोल्हा लगायट सक्कु ठारु जन्नी यक तक चुटी ढानक डाँट ओ लेर्वा हाँटक अँक्सा बनाक ठर्ह्यैल। मोल्हा हँस्या हुल्ना चक्यक पट्रा और सक्कु जहिनके हँस्या टर ढारल। हाँठम लेर्वा ओ ढान हाँठक अँक्सा बनाक बोट्लक छाँकी चुहैटी
"उट्टर डक्खिन पुरुब पच्छिउँ, सै सम्पट बै बर्कट, असौँक ढान पोर सालिक लेर्वा, लानो हो जख्वा जखिन्या हो..हो..हो..हो.." सक्कु जन यक्क संग कल।
औलि उटार्क घर ओहर सक्कु जन लग्ल। आपन आपन घरसे हाँठ मुह ढो क हेल्का और टापी लेह्ल जन्नी बुर्ह्या कुल्वा ओँहर लग्ल। ठारु भर कन्ढा म फर्ह्वा कोड्रा लेल मुस कोर गैल।
मोल्हा बगर्वम ठर्ह्वाइल बरा पुरान जमानक अभोन साइकल पोँछ पाँछ कर्क डुर्गौली चौरहा म सुरिक सिकार लिह गैल। सिकार कट्ना डुग्गि कलक यक्क ठो उह डुर्गौली चौरहम किल बा। मोल्हक जनेवा भाट भन्सम लागल। गुर्वान छोट्की अस्नक पाटक डोनि गँठ्न म लागल बटिन। मोल्हक छावा पुर्वक सक्कु घर औलि खाए हमार घर अइहि कैक जनाइ गैल।

" जाई मोर लोठ जाई बर्खम साँढ छँटही अपने छटिम कुडही फेन अपने"। अजगरान चुल्ह्या मोल्हक छावा घुम्टी किल बर्बराइल जो लग्लिन।

गैलक बर्खम खेट्वक साँढ छाँटल कैक अजगरान चुल्या ओ दहितान मोल्हक जनेवक महा कर्राके झगरा हुइल रहिन। यहाँ सम्म कि ट्वार मुले मै नै, म्वार मुले टै नै। ओसिक ट गल्टी डुनि पक्षक रहिन। डुनु टरफसे साँढ म माटी चर्हाइक नि ट अउर झन साँढ छँट्ल जो रहै। मने यी बाट सम्झाई के।

"नाही आज फेन का हुइल जे"? घाँसक बोझा उटर्टी चुल्ह्यक ठर्वा पुछ्ठिस।

"का हुइ, नै डेखठो बरा बिसर गैल हुहि कैक औलि खाइ अइहो कैक जनाइ पठाइल रह जे छिनारी"। अट्रा झट्ट बिस्राइ वला नै हु"। चुल्ह्या न कर्रक बर्बरैलिन।

दहिताने ट उ बाट भुला जो गैल रहै मने अजगरान चुल्यक रिस अभुन नै बुटल हुइटिन। मानौ बरट आगिक मट्टिक टेल अख्न्या डेहल जसिन।

"कसिन जन्नी हो यि,रान परोस के हुके हुक्रन ट जनैना कर्तव्य हुइटिन आब जैना नि जैना ट ट्वार उप्पर भर परट। आब हुक्र आपन गोट्यार अस मान्क ट बलाइ पठैल। अभुन डुख बेराम कर्रा परल बेलम काम लगुइया कलक रान परोस गै-गोट्यार ट हुइटै। हुक्र बिसर गैल कलसे टुहिन फेन बिस्राइ पर्ना हो जे"।
अजगर्वा आपन जनेवाहँ चोखाइल खाटिहँ खिडोर्बो ट रकट आइठ कना बाट सम्झैटी कहट।
बरा घनी अस्ट अस्ट बाट सम्झैटी रलक ओरसे अजगर्वा सम्झैनम सफल हुइट और दहितान घर जैना बिचार कर्ठै।

मच्छी मार गैल जन्नी कुल्वमसे आसेकल बटै ओ मुस कोरुइया ठारु फेन। मछरमर्निन डिल्यक मच्छी अखिन्क हेल्का टापी लेल आपन आपन आपन घर ओहर लहाई गैल। ठारु भर मुस भुज्क पनाई लागल बटै। गुर्वान छोट्की और मोल्हक जन्नी मच्छिनके भुँर कर्ह्टी बटै। मोल्हा फेन सुरिक सिकार लेक भर्खर पुगल। भन्सा करुइया डुइ जन किल हुइलक ओर्से डान्चे ढिल हुइटिन। ढिल हुइटा कैक ठारु फेन भन्सक कामम हाँठ बाँटैटी बटै।

डिनक मरल मच्छी, गेँगटा, घोँघी, सुटही, मुस्वक चट्नी, लौका मिलाइल मुस्वक टरकारी, सुरिक सिकार, दाल, आलु मेर मेरिक टरकारी पाकल बा।

लगभग भाट भन्सक ढन्ढा निमज गैल बा। जन्निन फेन लहा खोर क जुट स्याकल बटै। घरक बहरी म सक्कु जन पहाँट लाग्क बैठल बटै। सक्कुनके आघ डोन्यम मेर मेरिक सिकार टर टरकारी और खोर्वम झ्वार फेन बटिन। सक्कु जन गल्गैटी बटै। ओट्रम।

" अरे गुर्वान छोट्का असौं मन्ड्रा डफ बजैना बिचार नैहो कि का"? अजगर्वा खोर्वक झ्वार स्वाट्ट पर्टी अँग्री चट्टि कहट।

"जाउ न डेउखरान घर मन्ड्रा ओ डफ लिह"। अजगर्वा कहट।
"डफ मन्ड्रा लान्क किल कहाँ हुइ बजुइया फेन ट चाहिँ"। चुल्ह्या बोल्लिन।

"अरे मन्ड्रा ट मै बजा ढारम, डफ फेन किउ किउ बजाई जे, बेन्सेक ढमार उठुइया नै जोहैही"। गुर्वान छोट्की मिर्चक कचौरा कौँच पर्टी कहल।

"मन्ड्रा बजुइया ट डेउखरान भाटु हुइटै कसिन खोट बोल्वैबो हुकिनसे।
डफ ट संङ सङ मै फेन बजा डारम टाल टाल म मिलैना किल ट हो"।अखिस बोल्ना पाल्या मोल्हक।
सक्कु जन गल्बे सल्बे बट्वैटी रहै कि न कहटी डेउखरान मोल्हक भाटु डफ मन्ड्रा लिल आपुगल।

" आउ भाटु बस टुहारे कमि रह। न मन्ड्रा बजुइया न ढमार उठुइया किउ जोहाइट नि रहै। "अइलो बर्ह्या कर्लो, लेउ ट भाटु टुहि मन्डर्या टुहि मोर्ह्या। मै भलिमुन डफ ट ठठैबे करम"। मोल्हा बिन पाल्या डेल फेनसे आपन भाटु हँ कहठ।

" अरे साला औलि खाए और ढमार नै यी ट यक्को निसुहाइल जे"।मोल्हक भाटु बल्ले मुह ख्वालल। और यक लाग ढमार उठाइल।

" यरवा बिनै डुइचार, मौनी बिनै हजार, सासू कहिके पठाई, नन्डी ढिरे चलो, बिछु लरिहै घाट, घैला छलक सुन्डर भिजे गोरि, कि घैला छलक सुन्डर भिजे गोरि, घैला छलक सुन्डर भिजे गोरि।

अरे कहोरी ट बटै मोरे नैहर रे, कहोरि ससुरार, कहोरी ट बटै मोरे खेलना हो, मोरे जियरा उडास घैला छलक सुन्डर भिजे गोरी, कि घैला छलक सुन्डर भिजे गोरि, घैला छलक सुन्डर भिजे गोरि।

पुरुबे ट बटै मोरे नैहर रे, पँछिउ ससुरार, बिछ मन बटै मोरे खेलना हो, मोरे जियरा उडास घैला छलक सुन्डर भिजे गोरि, घैला छलक सुन्डर भिजे गोरि।

कि बरहे बरस पिहा गैने हो मोरे डखने बिडेश, अरे कहिया ट अइहि मोरे पिहवा हो, उहे जियरा उडास घैला छलक सुन्डर भिजे गोरि, घैला छलक सुन्डर भिजे गोरि।

कि बरहे बरस पिहा अइहि हो सोने मचिया बिछैम, अरे डेबु कलस जुर पानी हो, पुँछम हँसी हँसी बाट, घैला छलक सुन्डर भिजे गोरि,घैला छलक सुन्डर भिजे गोरि।

सक्कु जन औलि मनैटी झुमल बटै।