जोन्ह्या जसिन सिट्टर टुहार मैयम मन फुहाय पुगल ये म्वार ढक्ढिरक हिरोनी

 कबिटा

"ढक्ढिउरक हिरोनी"

अनारी फुलक 

टेम्ह्री जस्ट टुँहार बैँस 

उ जवानिक टेम्ह्री 

फेँक्रल अजराइल फुला कैह्या हुइ

मै भौँरक सङ्ग 

रिटुक डगरम बैस्क 

अस्या लग्टी कपारिम हाँठ ढार्क

मन भोहर कर्ल

डुन जहिनके आँख बठागैल

बट्या हेर्टी हेर्टी 

टुह अइलो रस रस 

पुर्बैया जुर बयाल बन्क

बर्सौंके रखाइल

आपन गहीर मैयक

टुहार याडम ढिकल ढक्ढिउरा

चमेलिक सुबासम रमाय 

खोजल यी बौरहा मन

छिर्कल ओजरिया 

जगमग राटम टोँरैया म्याला 

चमचम जोग्नि बौराय

गाउँक पुरुब मटाँवक फैलहर

अँगनम चौँकस नचन्या मन्डर्या 

डौना बेब्रीक मगमग बास

ओहर केँउला फेन लजाय अस

किरा काँटिनके चिँ चाँ बोल

मन्ड्रा मन्जिरा झालर

टुहार ग्वारक पायल अस बाजल

सुर सुर सुर सुर बयाल बहना 

काट्टिक अघन के मैन्ह

निँड नै पर्ठो 

म्वाकमसे बाहर हेर्नु 

जोन्ह्या जसिन सिट्टर 

टुहार मैयम मन फुहाय पुगल

ये म्वार ढक्ढिरक हिरोनी