बुबा
भारी भारी बन्वा पख्वा फँर्लक भुलैले कि?
साल भरिक कमाही
२ बोरा बिगहा पैलक भुलैले कि?
बन्जर डँर्वाम
कोड्रा हर चलैलक भुलैले कि?
बर्सौसे पर्बट्यक घर
बेगारी कर्लक भुलैले कि?
भुलल निहुइटे कलसे
यिहो निभुलल हुइबे
उ ब्यालम घर घर आके
डाडु मलाई भोट डिनु
बाजे मलाइ भोट डिनु
कैक नेट्वन हाँठ जोरके
भिख मङ्ग्लक
नेपालके आडिबासी ढर्टिपुट्र
हुके फेन
पाछसे आइल
डस खोल्वक उपारके पर्बट्य आके
हमार रकट पस्ना चुहाइल
कर्म भुमीम आपन हक जटाइल
हमार चेलीबेटिन उप्पर
डुर्ब्यबहार करल
ओह पर्बट्यसे सटौवा पाके
यक ठाउँ से और ठाउँ म छारा कर्लक
अभिन निभुलल हुइटे न बुबा?
बिक्रम सम्बट २०७८
ठारु सम्बट २६४४ हुइठ
कलसे ट नेपालम सब्से पहिले
ठारुनके बस्टी बैसल नि ट
टभुन खै
आने डेससे आइल
मढेसी कहट जे
अरु अट्रम ट बुझक पर्न हो जे
ओहर पैल्हसे आभुन सम्म
माओवादी, कांग्रेस, राप्रापा जसिन
पर्बट्यन किस्नै खेला सेक्ल
उ समयम
जहोर टहोर
बम बारुडके अवाज ग्राम ग्रूम
ठाउँ ठाउँ कर्या ढुवाँ उर
कहु टायर बर्ल
कहु झुक्का जरैल
आपन अल्ग पहिचान बनाइक लाक
कैयो डाडु भैया बलिडान हुइल
कैयो भौजिनके सेँन्डुर पोँछल
कैयो डाइ बाबनके कोख सुन हुइल
कैयो छावा छाइ टूवर हुइल
अट्रा ढ्युर बलिडान कर्क
आखिरम फेन हम्र ठारु
किस्नै खेलाई नै पैल
यक्ठो ठारुन्क लाग
यक परगा आघ जो बर्हाइल
हेरो आज हमनसे सिखल
आपन मनैन उप्पर चह्र बेर
ढक्का लगाइक नि
झन ग्वारा पकर्के टरे गिरैना
उहो सिख्ल नि ट
आज हमन लाग लराई करुइया
कारागार भिट्टर बटिन
टभुन फेन झुक्का बन्के
हेरल कर्हो
असिक ट
हमार पहिरान
हमार गीट बाँस
हमार रिटि संकृटी
हमार पहिचान
सक्कु बिलिन हुइटी जाइटा
आब असिन हुइ निडेहक लाग
खोज्नि बोज्नी ट करही परि
0 Comments